آکھیا خواجہ غلام فرید نے

کیا حال سناواں دل دا
کوئی محرم راز نہ ملدا

مونہہ دھوڑ مٹی سر پایم
سارا ننگ نموز ونجایم
کوئی پچھن نہ ویڑھے آیم
ہتھوں الٹا عالم کھلدا
آیا بار برہوں سرباری
لگی ہو ہو شہر خواری
روندیں عمر گزاریم ساری
نہ پایم ڈس منزل دا
دل یار کیتے کرلاوے
تڑپھاوے تے غم کھاوے
ڈکھ پاوے سول نبھاوے
ایہو طور تیڈے بیدل دا
کئی سہنس طبیب کماون
سے پڑیاں گھول پلاون
میڈے دل دا بھید نہ پاون
پووے فرق نہیں ہک تل دا
پنوں ہوت نہ کھڑ مکلایا
چھڈ کلڑی کیچ سدھایا
سوہنے جان پچھان رلایا
کوڑا عذر نبھایم گھل دا
سن لیلٰی دھانہہ پکارے
تیڈا مجنوں زار نزارے
سوہنا یار تو نے ہک وارے
کڈیں چاہردہ محمل دا
دل پریم نگر ڈوتانگھے
جتھاں پینڈے سخت اڑا نگے

نہ راہ فرید نہ لانگھے
ہے پنڈھ بہوں مشکل دا